ដោយ៖ កំចាយ
កំពត÷ នៅតាមបណ្តាវិទ្យាល័យនានាក្នុងខេត្តកំពត គណ:គ្រប់គ្រងសាលាបានរៀបចំសង្ក្រាន្តឆ្នាំថ្មីដើម្បីបង្កភាពសប្បាយរីករាយសម្រាប់សិស្សានុសិស្សមុនឱកាសវិស្សមកាលចូលមកដល់។ ជាមួយសកម្មភាពចូលរួមហាត់សម និងលេងល្បែងប្រជាប្រិយផ្សេងៗ គណៈគ្រប់គ្រងសាលាបញ្ជាក់ថា សង្ក្រាន្តវិទ្យាល័យធ្វើឡើងដើម្បីរំលេចអំពីវប្បធម៌ប្រពៃណីទំនៀមទម្លាប់នៃល្បែង របាំប្រជាប្រិយខ្មែរដែលជាកេរដំណែលរបស់ខ្មែរ។
ក្រុមសិស្សថ្នាក់ទី១២នៃវិទ្យាល័យព្រះនរោត្តមរណឫទ្ធិក្នុងស្រុកទឹកឈូបានប្រាប់ឲ្យដឹងថា៖ ឆ្នាំនេះ គណៈគ្រប់គ្រងសាលាបានអនុញ្ញាតឲ្យរៀបចំសង្ក្រាន្តវិទ្យាល័យដើម្បីបានកម្សាន្តសប្បាយមុនវិស្សមកាលចូលមកដល់នៅថ្ងៃទី៦ ខែមេសាដ៏ខ្លីខាងមុខ។ ពួកប្អូនពិតជារីករាយក្នុងការចូលរួមហាត់សម និងលេងល្បែង ក៏ដូចជាការរាំរបាំផ្សេងៗ។ ក្រុមសិស្សានុសិស្សបានបន្តថា ការរៀបចំសង្ក្រានវិទ្យាល័យនឹងបង្កបរិយាកាសសប្បាយរីករាយនៅក្នុងសាលា បង្កើនសាមគ្គីភាព ពិសេសបានចូលរួមអភិរក្សវប្បធម៌ ទំនៀមទម្លាប់ ប្រពៃណីខ្មែរកុំឲ្យបាត់បង់។
លោក ស៊ុយ ធឹង នាយករងវិទ្យាល័យព្រះនរោត្តមរណឫទ្ធិបានបញ្ជាក់ថា ចូលដល់ថ្ងៃទី១ ខែមេសា ឆ្នាំ២០២៥នេះ សិស្សានុសិស្សបាននាំគ្នាចូលរួមហាត់សម និងលេងល្បែង រាំរបាំប្រជាប្រិយយ៉ាងសប្បាយរីករាយ។ សង្ក្រាន្តឆ្នាំនេះ សាលាគ្រោងរៀបចំក្នុងទ្រង់ទ្រាយធំដែលនឹងធ្វើឡើងនៅថ្ងៃទី៤ ខែមេសា ដោយបំផុសនូវសកម្មភាពជាច្រើនក្នុងន័យអភិរក្សវប្បធម៌ ប្រពៃណី ល្បែង របាំប្រជាប្រិយរបស់ខ្មែរ។ ក្នុងនាមគណៈគ្រប់គ្រងវិទ្យាល័យ លោកសូមថ្លែងអំណរគុណដល់ថ្នាក់ដឹកនាំខេត្ត ពិសេសឯកឧត្តម ម៉ៅ ធនិន រួមទាំងលោក អ៊ឹម ច័ន្ទសោធន អភិបាលស្រុកទឹកឈូដែលតែងបានគិតគូរ និងជំរុញក្នុងការរៀបចំសង្ក្រាន្តវិទ្យាល័យនេះឡើង។ លោកនាយករងបានបន្តថា ជាមួយគ្នានេះដែរ មន្ទីរអប់រំ យុវជន និងកីឡាខេត្តក៏បានលើកទឹកចិត្តឲ្យមានការរៀបចំកម្មវិធីសង្ក្រាន្តនៅគ្រប់វិទ្យាល័យទូទាំងខេត្តតាមលទ្ធភាពដែលអាចធ្វើបាន៕
